Karakarambau Bula Bhe Wadhekamomombheludhu
Karakarambau bula ini netisaamo o foo seghonu, naseha-sehae katisano maitu nokobhakemo. Wadhekamomombheludhu ini nokalamo wekundono lambuno, nokala neghondohi o bhelomba. Gara miina narumato we keutahano bhelomba, nofewonomu kawonduno foo. Noangkamo we koro foo maka neghondohi. Gara ini, bakeno foo karakarambau bula nokutumo. Noeneemo Wadhekamomombheludhu maka nofumaae. Nase-hasehae karakarambau bula nokalamo noghondohi bhakeno foono ghara minaemo. Nomamaraamo karakarambau bula ini. Nokalamo welo liwu, maka nokala we kolambuno, saratono nofoni welolambu. Nobisaramo kolambuno ambano “ingka karakarambau bula itu aini kaasi” nobisaramo karakarambau bula “inodi paa” ambano kolambuno “waghomesogho waghomepagho” amba karakarambau bula “akido aeso akidi aepaa, somano mofotaa mbarara” nofotaamo kolambuno gara mina nanumando modedeano wangka. Samppe fitu ghonu lambu kakalahano, peda kansuru anagha karakarambau bula nobisara.
Nefitu ghonuno lambunagha gara lambuno kolakino liwu. Kolakino liwu nobisaramo ambano “ingka karakarambau bula itu aini kaasi waghomesogho waghomepagho” amba karakarambau bula “akido aeso akidi aepaa, somano mofotaa mbarara” nofotaamo kolakino lambu bhe ibuno gara ta Wadhekamomombheludhu pata motaano bisaramo karakarambau bula “noafa itu kaasi Wadhekamomombheludhu miina namotagho” nobisaramo kolakino liwu “miina narumungku lalono bhahi” amba karakarambau bula “toba paa akumilikilie” nokilikliemo karakarambau bula nokilikili Wadhekamomombheludhu.
Aitumaka Wadhekamomombheludhu nofotaa tonokaraamu, naitu karakarambau bula nowura wangka Wadhekamomombheludhu tono kadeadeamo. Nobisaramo karakarambau bula ambano “mepakesi aitu dokalaana” dofopakeanemu Wadhekamomombheludhu kosibabarihae bulawano. Nokalaanemo karakarambau bula noowae welo sangku. Noedaane karakarambau bula, nowolo notikaisi bulawa Wadhekamomombheludhu, nowule kaawu noedaane novetumpumu karakarambau bula, nofewule we korono bontu. Maka karakarambau bula nokala nobasi sabhangkahino, gara Wadhekamomombheludhu nowora olele naho sekampana, nofonimo ne lele anagha bhe nobisara “sio-sionomo lele kafonihaku ini napotubhari kalangke” tolu paku neulangie wambano, lele kafonihano halighoomu noratoe kawea bunta.
Nowuramo karakarambau bula nomai bhe sabhangkahino khabarindo todoowaowahimu karumbu dokala. Nobisaramo sabhangkahino karakarambau bula ini “hamaiemo itu mie kapulughomu” amba karakarambau bula “ingka naini kone aniini bhelahi afongkorae ne korono bontu” nowule kaawu doghondohie, dofumaamo karakarambau bula dopipisie bhe reano.
Nomate kaawu karakarambau bula, Wadhekamomombheludhu neghondohimu cara sanahumundagho nasumuli welambundo. Wadhekamomombheludhu nefetulumimo ne manu-manu okatogha ambano “tulumi kanawu bhela wa ogha!” ambano katogha “tamolimu dhua atulumi ihintu maemu paniku ini taambulu-ambulumo” gara ini noliumo piikore ambano ”tulumi kanau wa ore!” nopeemu pikore ne lele, nofonimo Wadhekamomombheludhu te towhuno pikore maka nohoro ane nopeane wekapaea nggiri-nggiri, bhe nobisara pikore “aini haemo Wadhekamomombheludhu” fitu paku noulangie wambano pikore, ambano kolakino liwu “ah.. Wadhekamomombheludhu hae dhua, Wadhekamomombheludhu nomponamo nomate nokobubumu wangkano welo wite” notudumo kafolatehino dakumala daghumondoe, gara bhe Wadhekamomombheludhu kotughu. Nosulimo kafolatehino maka noforato kolakino liwu.
